بقلم الدكتور/ عبادة رحيل
نقلها لكم ناصف ناصف
الصلاه يا شباب.. هقولك ع شويه تفاصيل كده تخليك تحب الصلاه وتوصل لدرجه الخشوع وتنتظم فيها لأنها هي الأساس اللي هتخلي مزاجك كويس ونفسيتك مطمئنه…
امشي بمبدأ انها صلاتك مش حاجه روتينيه و مُجبر تعملها .. لأ بالعكس انت بتكون رايح تقعد مع ربك شويه ولله المثل الأعلى طبعا
و هتقعد معاه خمس دقايق بس فى كل فرض .. كتير على اللي أنعم عليك بكل حاجه؟
قبل كل فرض استعد للصلاة و كأنك رايح تقابل حد بتحبه جداً
روح و أنت ملهوف ..
و أول ما ترفع إيدك وتقول : الله اكبر.. ابتسم ابتسامة مشتاق .. قولها وجواك صوت بيقول ( جيتلك يارب يا حبيبي وقفت بين ايديك).. انسى الدنيا كلها بمشاكلها و همومها فى اللحظه دى
أقرأ الفاتحة بكل راحة واسمع جواب ربك بعد كل اية .. و متقولهاش بسرعه و كأن حد بيجرى وراك.. تدبر معانيها.. 💜
و فى الاعتدال من الركوع لما تقول ” سمع الله لمن حمده “
احمد ربنا انت بطريقتك .. قول” الحمدلله يارب على كل النعم اللي اديتهالى”, ” الحمدلله حمداً طيباً مباركاً فيه كما ينبغي لجلال وجهك ولعظيم سلطانك ” :
و اول ما توصل للسجود افتكر انه أقرب ما يكون العبد لربه وهو ساجد ..حاول تطول في السجود على قد متقدر..منها أنك في وصال مع الله عز وجل.. ومنها ذنوبك بتتساقط من عليك الرسول ﷺ أخبرنا أن ذنوب الإنسان تُوضع على رأسه وكتفه فعندما يركع أو يسجد في الصلاه فإن ذنوبه تسقط عنه.. لما تهمس ببطن الأرض بيسمعك من في السماء… سبح ربك و ابدأ احكيله كل اللى ف قلبك قول يارب انا بحبك ..(يارب خليك معايا فى المحنه دى) .. ( يارب انا تايه وجهنى للطريق الصحيح ) .. ( يارب انا محتار فى الموضوع الفلانى ساعدنى ) .. احكي وفضفض لإن محدش هيفهمك ولا هيحس بيك زى اللي خلقك
لما تحكي مع الله مش هتلاقى حواجز بينك و بين ربنا .. و احكي بالعامية مش لازم لغه عربيه فصحى يعنى 😊 .. ربنا اعلم بحالك منك بس بيحب يسمع صوتك .. يمكن تتلخبط فى كلامك لكن ربنا عالم انت عاوز تقول ايه .. و صدقنى مهما كانت مشكلتك كبيرة و صعبه .. فى آخر كلامك هتحس براحه مش طبيعيه و هتبتسم لانك سلمت امرك لرب العباد 😀
و بعد ما تخلص صلاة .. سلم على الله لكن مش السلام التقليدي
لانك دلوقتى بتسلم على حبيبك .. تخيل انك بـ تقول ( هيوحشنى الكلام معاك يارب امتى تيجي الصلاة الجاية عشان أرجع اجلس معاك تانى لسة في كلام كتير فى قلبي حابب احكيلك عليه )
صدقنى اول ما تخلص صلاه هتحس بعدها انه مفيش حد قدك فى الدنيا.. مش تكبر وغرور ، لكن راحة وطمأنينة لانك كنت قاعد مع ربك .. مع حبيبك.. وسلمتله امرك وتوكلت عليه ولانه لما تواجهك اي مشكلة فى يومك مش هتهز شعره منك .. عارف ليه ؟!
لانك هتروح فى الصلاة اللي بعدها و تحكي لربك وتطلب منه يساعدك 😀
و يا بخت اللى يعرف معنى الوصال مع رب العالمين .. ربنا يرزقنا و اياكم الثبات والخشوع فى الصلاة. ❤️
