بقلم / أحمد الغنامي
عندك أهداف….. حاولت كتير…. فشلت… اوعي تيأس ويجيلك إحباط…
ايوة زي ما بقولك كده
خلي هدفك أدام عينيك دايما هتنجح وتحقق طموحك
وبلاش تسمع لافكار وكلام زي انت لسه بتحاول اكيد لو كنت صح كنت نجحت من اول مرة…. شوفت فلان أهوه عمل اللي انت بتعمله بس شاطر من اول مرة نجح..
كل ده غلط ومش صح ليه…
عشان كل ما الضغط هيزيد عليك وانت مستحمل وعندك طاقة صبر وإصرار كل ما هيتفتحلك أبواب متعرفش عنها حاجة وعلى قد ما هتستحمل على قد ما هتتفاجئ من النفحات الربانية اللى بتقويك وتخليك تكمل لحد ما تعدى اختبارك على خير وتدوق حلاوة نجاحك اللى تستحقه فعلاً…
و تعالوا نشوف ده في واحد جرب أفكار كتيرة وفشل ولسه مكمل بيتقال عليه غبى ومتسرع وواحد جرب فكرة واحدة نجحت بيتقال عليه ذكي وشاطر
بس للأسف صاحب الفكرة الناجحة واقف فى مكانه وخايف يكبر ليخسر….
أما اللى فشل لسه عمال بيجرب وعنده يقين إنه هينجح ولما يحصل ده هينجح نجاح كبير لأنه إتعلم حاجة من كل تجربة فاشلة مر بيها وعمل حاجة أهم….
الحقيقة أنا بسميها ” السعى وراء الخبرة “
وكمان لو هدفك محتاج حد يساعدك فيه يبقي لازم تقدره….
ايوة قدّر اللى بيشتغل معاك بالشكل اللى يحسسه إنه شريك فى الهدف مش مجرد أداة لتحقيقه عشان لما اللى بيساعدك ده في تحقيق هدفك يحس إنه شريك بالمجهود مش مجرد أداة وبس وقتها بس هيبقي عايز يطلع أفضل ما عنده معاك……
الخلاصة :
خلي عندك عزيمة وإصرار لهدفك وقدر اللي بيساعدك هتنجح وهتبقي صاحب خبرات وهتتقدم خطوات كتير ومن بعد ماكنت بتتعلم هتكون معلم لأن شرف المحاولة سر النجاح.
