متابعه /ناصف ناصف
خد أفلامك
خد أوهامك
واللي عملته في ميمي وصافي
واللي زرعته في طول أيامك
وانزل جوه القبر وشوف
طعم الذل وطعم الخوف
هي الدنيا ومش بتدوم
أصل الكل عليها ضيوف
وأنت يا خايب
عقلك غايب
لما اخترت العيشة الفانية
سبت وراك أفلام ومصايب
أخطر من براكين وحروب
تفضل تحصد منها ذنوب
طول ما عيون الناس بتشوفها
طول ما الدنيا شروق وغروب
خد أحضانك
مع رقاصة ولحم رخيص
كل فسادك
عند حسابك بلا ترخيص
خد حركاتك
خد سكناتك
وارقص ويا الهم وهيص
عاش النجم
ومات النجم
وانا مش عارف نجم في إيه
نجم بيصنع كل فساد
بالأحضان واللحم العاري
نجم بيخطف عقل ولاد
يقتل عمري ويسرق داري
وأنا فرحان مشغول بمشاهد
فيها اللص الخاين راقد
جنب البطلة البايعة شرفها
وجوزها النطع الساكت شاهد
حاجة غريبة
حاجة عجيبة
حاجة تخلي العقل يئن
صبح وليل
هم تقيل
يفسد طبعا إنس وجن
وفيلم دعارة
بكل جدارة
وجهلة بيهتفوا باسم الفن
اللي رمانا في عمق محيط
خلى حياتنا بقت شخابيط
شفنا العالم صامت خايف
وبقى القدوة جهول وسليط
طالع نازل يهدم حصن
واحنا بكل غباء بنقول
عاش النجم وعاش الفن
———————————
خد أعمالك
فوق المسرح سافر بيها
خد أحلامك
عند نهايتك تبكي عليها
خد أفيشاتك
خد قفشاتك
خد صفقاتك
لحظة موتك شاور ليها
أنت زرعت الأرض فساد
أنت حرقت بذور وحصاد
أنت طعنت الحلم الغالي
للي بيرسم هنا أعياد
خد ملايينك
وامنع بيها حساب محتوم
خد مجانينك
يفرحوا عند بداية الزوم
شوف كام واحدة حضنت قفشت
شوف كام أسرة خربت طعنت
شوف كام جيل
لم وشيل
وانزل قبرك شوف الصمت
شوف الدود بيشد عيونك
لما الدنيا في لحظة تخونك
فين العز وفين المال
فين حراسك وقت جنونك
فين جماهيرك
فين مشاويرك
فين الليل يشهد ويقول
أنت رسمت الوهم لغيرك
أنت اخترت صناعة الزور
علشان تبقى غني ومشهور
لكن فكرك طبعا خانك
عاش الدنيا بكل غرور
ساب الحق وراح للباطل
لحظة وعيك كان بيماطل
فاكر الدنيا أكيد هتدوم
علشان عقلك نايم عاطل
كل عمايلك باقية عشان
تبعت ليك حسرة وأحزان
بس يا ريت الناس بتفكر
تاني تعود بعد التوهان
ترجع ترسم تاني حياتها
على الأخلاق بعد الإيمان
ترجع صورة العالم حلوة
فيها محبة وفيها أمان
فيها ولادنا
صنعوا طموحهم
رسموا حياتهم بالألوان
كتبوا نجاحهم
عرفوا كمان أفضل عنوان
