للشاعر محمد الشرقاوى شد الحزام من غير كلام الجوع وصل طحن العظام واحلم وقول فينك يا فول كل الحلول جرح وآلام شد الحزام ------------------ شد الحزام ضاع الرغيف حب الصيام يا تنام خفيف تمن السكوت يا جنان يا موت والظلم حوت قتل السلام شد الحزام ------------------ شد الحزام واشرب مرار لا تقول حرام ولا عيشة نار شوف الهوان وانس الأمان عيش الزمان من غير صدام شد الحزام ----------------- شد الحزام ما انت الخبير عارف تمام لحم الحمير تاكل بشوق تملا العروق وتعيش يا ذوق وسط النيام شد الحزام ----------------- شد الحزام ما تفكهوش كل الطعام عند الوحوش واحفظ نشيد سادة وعبيد إيه الجديد جاوب قوام شد الحزام ------------------ شد الحزام واحسب سنين واصحى ونام مهموم حزين قصة خداع كتبت ضياع عد الجياع عرفني كام شد الحزام ---------------- شد الحزام حتى الممات توه في الزحام واشبع آهات ليلك طويل حملك تقيل خايف ذليل لطيور ظلام شد الحزام ----------------- شد الحزام واعمل جناح وبلاش ملام ولا كان وراح وافرح يا مصري دا الفقر حصري واخد في عصري أعظم وسام شد الحزام ----------------- شد الحزام دوس ع الآمال قول للمدام قول للعيال الناس ديابة والدنيا غابة ترمي الغلابة تحت الترام شد الحزام -------------- شد الحزام يا عم شد قال النظام الجوع يهد أحلامنا ضاعت والحلوة باعت والناس أطاعت والحال تمام شد الحزام
