الأدب والشعرثقافةصحيفة المواطنفن

من دفتر الأشعار

بقلم الشاعر/ محمد الشرقاوي

( ١ )

صباح الفل يا أهل الفيس

بالحب أكيد نهزم إبليس

الكلمة أمانة ليوم الدين

تصنع أحرار أو شعب تعيس

( ٢ )

شد عزم الناس يا شاعر

ترجع البسمة اللي غابت

حرف منك جندي ماهر

ضربته ولا مرة خابت

( ٣ )

فيه ناس بتزرع صحاري

وناس بتخرب جناين

والقلب لو حب شاري

يمشي عشانك مداين

( ٤ )

مصر أمن الكون ونوره

مصر تاج فوق الرؤوس

كل مخلص ليها دوره

ع الفساد يهجم يدوس

( ٥ )

خاصم حروف الجر

لو جاي وراها الشر

الدنيا ساعة سفر

وحسابنا ما له مفر

( ٦ )

وشاعر مغامر وشاعر مشاكس

وشاعر بيمشي الطريق المعاكس

وشاعر مهلل ، وشاعر مطبل

وشاعر بيلبس جميع الملابس

( ٧ )

خلي عندك فكرة نافعة

خلي ليك في الدنيا بصمة

حط في ميزانك فوايد

ساند المظلوم ببسمة

( ٨ )

لسه لينا قلب حي

كل حلمه يلاقي ضي

ينصف المظاليم ويرسم

مصر حلوة ما ليها زي

( ٩ )

لما الحر يقول وانا مالي

يصعد كل خسيس وضلالي

يهرب عالم ، يرجع ظالم

تبقى حياتنا كابوس في ليالي

( ١٠ )

انتي لو فعلا جميلة

صوني نفسك بالحجاب

ترفعي أخلاق وعيلة

وترحمي جوع الشباب

( ١١ )

الجوايز ليها ناسها

والأماكن ليها ناسها

والمواهب يا ابن عمي

بكل قسوة القطر داسها

( ١٢ )

حتى لو مليون كتاب

مش هقول لك انت شاعر

انت عايش في الضباب

والمواهب فكر واعر

( ١٣ )

منصب بلا أفكار

معجم من الأخطار

يهدم طريق الأمل

ويحطم الأحرار

( ١٤ )

لسه قلب الحر نابض

مهما زاد نبح الكلاب

حتى لو ع الجمر قابض

عمره ما بيخشى الصعاب

( ١٥ )

ارسم الأحلام في صورة

وارم ألف رصاصة حية

فن هابط قال وكورة

كل هم شعوب غبية

( ١٦ )

كنت هكتب فكرة جامدة

بس خايف يسرقوها

رغم مية مليون معاهدة

اللصوص بيغرقوها

( ١٧ )

طبل وارقص تكسب ياما

قول لمبادئك ألف سلامة

عيش الدنيا بعرض وطول

بس الآخرة هتبقى ندامة

( ١٨ )

عايز اقول لك سر خطير

كل الدنيا بقت عصافير

هم عبيد لعيون أسيادهم

وانت بنور الذكر أمير

( ١٩ )

ولما انت عالم وفي العلم مالك

وتقدر تغير ظلامنا اللي حالك

ما توزن كلامك ، وترفع مقامك

بلاش تحكي تاني في أهلي وزمالك

( ٢٠ )

ويكسب فريق ويخسر فريق

ولاعب بيملا البنوك في الطريق

وعالم شريف بيطلب رغيف

وجمهور في بحر التخلف غريق

شاهد أيضاً
إغلاق
زر الذهاب إلى الأعلى