(رباعيات ميجو)

مجدى صبحى يكتب 

الوجع

من كتر الوجع بقى الألم شيئ مألوف..

الكل شايف وعامل نفسه مش بيشوف..

يشوف أخوه فى محنة وبيتفرج مكتوف.

والفرحة بقت هدية فى سلوفان ملفوف.

(فين ماعرفش)

فين ماعرفش وعلمى علمك..

الله أعلم مش بتقلل منك..

مش مضطر تفتى عن جهلك ..

بالجهل تضيع غلبان سألك..

(مش بيدوم)

بص يا فاسد الحرام مش بيدوم..

ريحتك فايحة رغم شياكة الهدوم..

مال مابيسعدش جلاب الهموم..

والحجر الداير لازم يتلط ف يوم..

(أسكت)

اسكت يا لسانى ماتتكلمش..

بس يا قلمى ماتكتبش..

انا وأنتوا مابنتكسفش.. نسكت احسن ولا نغش..

(إتغيرت)

هى اتغيرت ولا إحنا اللى غيرنا ملامحها..

مهما تدينا مش حاسين إلا بأوجاعها..

الفرحة تاهت ومش عارفين نرجعها..

الفرحة بقت حرفة حريف اللى يفرحها..

(فتح عين)

فتح عين وغمض عين لو هاتغفل..

اصحى يا صاحبى لحسن تتغفل..

لو تأمن لخسيس تبقى مغفل..

ولا تدور ع الحظ بعد ما يقفل..

(شغتة)

خليك حقيقة فى وسط الغش..

خليك مثابر شغتة ما تتبلعش..

اوعاك يذلك فى مرة

القرش..

عاوزك فى وسط البحر قرش..

(عيش)

عيش وكل بالف هنا وشفا..

بلا جوع وعيشة مقشفة..

الأرنب بيعيش ولا السلحفاة.

الريچيم حرمان وضرب ع القفا

(طرابيش)

طرابيش للقيمة وطرابيش للزينة..

عملوها انتيكة ولاد اللذينة..

طربوش على البدلة سيما وقيمة..

وع الضروس البايظة تبقى متينة

(تايه)

وتاه فى التوهان..

امر م السحر الزن ع الودان..

كان خالى وف الأمان.. عشموه بالحلق خرم الودان. وعجبى

(طناش)

شن بسرعة حملة طناش..

طنش عدى ما تحسبلهاش..

حلوة الشطة لو ما تزودهاش..

لو مش قدها ما تحطهاش..

(الرف)

اللى يضايقنى اركنه ع الرف..

خسارة فيه كلمة ولا حرف..

ينام من جوة اسيب له الطرف..

يحب الطرية اسيب له الحرف..

(مغفل)

فتح عين وغمض عين لو هاتغفل..

اصحى يا صاحبى لحسن تتغفل..

لو تأمن لخسيس تبقى مغفل..

ولا تدور ع الحظ بعد ما يقفل..

(لبس الحمار)

لبس الحمار وعمل فيها جواد.. اترسم وشاف نفسه على الجياد.. تقلوا عليه ولما الحمل زاد.. نهق بحموريته صحى العباد