بقلم/ أسامه حواله
المقادير:
ربع كيلو فول مدشوش (مغسول ومنقوع ساعتين)
بصلة كبيرة مقطعة أرباع
5 فصوص ثوم كبار
حزمة كزبرة خضراء وحزمة شبت (مفرومين خشن)
معلقة كبيرة ملوخية ناشفة (هي دي اللي بتظبط اللون والقوام الزبدة!)
ملح، كمون، كزبرة ناشفة، شطة
للجرنش (الوش): بصلة كبيرة جوانح، معلقة دقيق، وزيت للقلي .
الطريقة:
السلق: في حلة، حطي الفول المدشوش والبصلة الأرباع والثوم والخضرة الخضراء، وغطيهم بالمية. سيبيهم يغلوا على النار لحد ما الفول يستوي تماماً ويبقى طري جداً .
الضرب: سيبيه يبرد شوية، وبعدين اضربي الخليط في الخلاط أو بالهاند بلندر لحد ما ينعم خالص ويبقى كريمي .
الغليان والسر: رجّعي الخليط الحلة تاني، وضيفي الملح والكمون والكزبرة الناشفة، وانزلي بمعلقة الملوخية الناشفة بالتدريج مع التقليب لحد ما تاخدي القوام واللون الأخضر الجميل . سيبيه يغلي غلوتين.
الورد (البصل المحمر): قلبي جوانح البصل في معلقة الدقيق واقليها في زيت غزير لحد ما تقرمش وتبقى ذهبية (زي بصل الكشري). خدّي معلقة من زيت البصل ده وحطيها جوا البصارة وهي بتغلي عشان الطعم !
التقديم: صبّي البصارة في أطباق وهي سخنة، وسيبها تهدأ وتجمد شوية، وبعدين وزعي على الوش البصل المقرمش وبالهنا والشفا.
