بقلم / أحمد الغنامي
خصام وهجر وزعل….. ووجع بين نفسك من كتر الألم
لما بتزعل من حد بينك وبينه مودة وعشم….
عشان دايما فاكر انك صح وعلى حق ولسان حالك بيقولك هو اللي بدء والود هان وكتر الزعل ……
هو لو فيه ود اصلا اكيد عمره ما كان هيهون؟؟!!
وقت الخصام والزعل ياما حقوق بتضيع…. وأوقات حلوة كانت ممكن تبقى ذكرى جميلة….
بنقف لبعض على الواحدة وبنكبر الموضوع ونفتكر القديم كله ونتلكك لبعض…..
ومن بعد ما كنا أعز حبايب… بنجرح في بعض وبقينا أعداء وقت الزعل…
طب اقعد مع نفسك وفكر شوية…. تخيل انك لما تتخاصم مع حد عزيز عليك انك مش هتشوفه تاني وإن الموت هيكون أسرع من قرار صلحكم على بعض…
طب بذمتك مش وقتها اي سبب للزعل هيهون والود هو اللي هيدوم….
كلمة”أنا آسف” دايما تقيلة على اللسان طب ماتجربها حتى لو مكنتش غلطان …. وبلاش نستكبر نعترف بغلطنا.
وخلينا مع إسلامنا ” وخيركم من يبدأ بالسلام”.
وبدل الخصام نواجه بعض ونوضح سبب الزعل وندي للطرف التاني فرصة فى الدفاع عن النفس وتطييب خاطرنا.!
ولو زعلك شخص بينك وبينه مودة افتكر له كل المواقف الحلوة اللي كانت بينكم ساعتها اكيد هتشفعله.
وكمان لو أعتذر لك شخص على أي حاجة حصلت منه سامحه وكفاية شجاعته واعتذاره وده دليل على محبته ووده .
واخيرا لو لقيت ود من حد في حياتك اتمسك بيه عشان مش هتلاقي زيه كتير في دنيتك…
وحافظ على المحبة بإخلاص واوعي تقول ماخلاص هانت المحبة بينا لأن الود عمره مابيهون وخليك مراهن دايما على الحصان الكسبان.
