كتبت/ دولت حجازى
في زمن بقى كل شيء فيه سريع ومتلخبط، بقى قليل قوي الناس اللي لسه متمسكة بـ “الأصول”. الأصول مش مجرد عادات أو كلمات بنرددها، دي قيم بتبين معدن الإنسان، زيه وزي ميزان بيكشف إن كان أصيل ولا مجرد شكل من بره.
زمان كانوا يقولوا “الأصول مش محتاجة تعليم”، لأنها جزء من التربية والضمير. يعني لما تساعد الكبير، أو تصون وعدك، أو تحافظ على سر غيرك، ده مش عشان حد شافك أو استنى منك مقابل، لكن عشان ده الطبيعي عند الإنسان الأصيل.
المشكلة إننا بقينا نعيش في عصر كتير فيه بيجري ورا المصلحة الشخصية وينسى العِشرة، ينكر الجميل، ويبيع القريب قبل الغريب. بقى الطبيعي إن الغدر يتسمى “شَطارة” والكذب يتسمى “ذكاء”، لكن الحقيقة إن كل ده ضعف مش قوة.
الأصيل مش بيحتاج يرفع صوته ولا يثبت نفسه بالكلام، هو معروف من أفعاله. في عز ما ناس بتبيع وتشتري في المشاعر، الأصيل بيبان إنه جبل ثابت، ما بيتغيرش مهما تبدلت الظروف.
