الحكاية
قصيدة للشاعر محمد الشرقاوي
الحكاية وبصراحة
إن ما في الدنيا راحة
فرحة واحدة سيول متاعب
زي نملة في وسط ساحة
والعيون الكدابين
لسه لابسين القناع
يخدعوك طول السنين
وانت عايش في الطباع
الوفا والصدق حالك
والمحبة رأس مالك
كل حلمك يا ابن عمي
السلام يحفظ عيالك
لو تفكر بس مرة
ليه بقى العالم صراع
ناس حياتها كاس وسهرة
وناس بتشكي من الضياع
ناس بتلعب بالفلوس
ناس بتطعن في النفوس
ناس في ملهى
ناس في ملعب
ناس على الأحياء تدوس
واللي سايب بنته لابسة
نص كم وربع كم
واللي مانع كل همسة
لاجل صوت الخوف يعم
واللي ياكل من زبالة
واللي واقع في العمالة
واللي صوته بشعب كامل
واللي اسمه يدوب كمالة
واللي ماسك طبلة حالف
للي يدفع يمشي زاحف
واللي وسط الصمت واقع
واللي بايع واللي خايف
واللي بات في الجهل عامل
إنه رمز العلم كله
واللي عاش موهوب وعاقل
ماشي خايف حتى ضله
والشوارع والنواصي
صورة فيها فساد كبير
والمجالس والكراسي
فيها صار مليون خبير
صبح ليل حافظين كلام
الأمانة طريق نجاح
والتعامل باحترام
والطموح طالب كفاح
بعدها تسمع عجايب
قول كوارث قول مصايب
تحلف إنك كنت خايب
لما صدقت الظلام
واما تسمع دون كسوف
إن رمز العفة خان
وان تعليم الحروف
ما لو قيمة في الزمان
والطاغوت ماسك سلاح
وسط أرض المسلمين
والوطن مكسور جناح
والعرب متفرقين
واللسان مكتوم جبان
راضي عيشته في الهوان
لو يقول الحق مرة
يبقى في عيونهم مدان
والملاعب والمسلسل
فرض لازم كل يوم
حتى لو مش لاقي تاكل
أو بتغرق في الهموم
والنصيحة من اللصوص
عيش بعيد واعمل عبيط
راح زمان كل النصوص
والفساد أصبح محيط
نفسي الاقي حد عاقل
يرفض التوهان بجد
يرسم الأوطان جميلة
فيها عدل وفيها يد
تحمي احلامنا البريئة
اللي تاهت من زمان
نلقى تاني عيون جريئة
ترفع الخوف والهوان
تنطق الأيام سماحة
في المداين والنجوع
بس لو من غير جراحة
أو خسارة في الزروع
هي دي كل الحكاية
وبصراحة
إن ما في الدنيا راحة
فرحة وسط سيول متاعب
زي نملة في وسط ساحة
