بقلم / أحمد الغنامي
كل حد فينا في حياته كائن قليل الذوق……
والكائن ده عنده مشكلة كبيرة أوي …. وهي
” الجليطة” ……
وفي نفس الوقت الكائن ده عمره ماشاف أنه عنده مشكلة أصلا بالعكس مفكر نفسه أنه صح ودايما صاحب حق….
لما تعامله بقيمه وإحترام لدرجه هو مش متعود عليها فيقرر أنه يعاملك بقلة إحترام توصل للبجاحة…
يفضل يجري وراك ويخنق فيك طول ماهو محتاجك وعاوزك وده بيبقى بالنسباله حق مكتسب….
ولما بتبقى أنت محتاجه متلاقيهوش وبيبصلك على إنك كائن متطفل وبترخم عليه في أوقات هو مش محتاجك فيها.
الكائن ده متعود دايما يعيش زي ما بيحب هو…. مش بيراعي أي حد ادامه… لا وكمان ممكن يجي عليك وقت مصلحته أو إحتياجه وبعد كده كانك مش موجود لأنك مش في الحسبان اصلا…
ولو قررت إنك تكبر دماغك من أسلوبه وطريقته وتلتمسله الأعذار هتلاقيه ع طول بيثبتلك العكس بأساليب تخلي مفيش عذر يتقبل منه وليه بسبب أفعاله…
كل اللي أقدر أقوله كفاية قلة ذوق وخليك فاكر إن الذوق نعمة من عند ربنا ولو مش مصدق روح وأسأل…
ولو حضرتك مصمم على التعامل بقلة الذوق ربنا أكيد هيوقعك في حد يعاملك بنفس طريقتك يخليك تكره عيشتك….. وساعتها هتندم وتعرف أن الذوق نعمة….
