عاجل

يا كاتب الأشعار

قصيدة للشاعر محمد الشرقاوي

نقلها ناصف ناصف

يا كاتب الأشعار

مشتاق لضي نهار

إياك تبيع الأمل

أو تمشى فى التيار

كل العيون شايفاك

بتصارع الأمواج

وكتير قلوب عاشقاك

لما وصفت علاج

بالحب والاصرار

يا كاتب الأشعار

_______________

لما الحروف بتهل

بتشد عود مكسور

ترسم جناين فل

تكسر ظلام وشرور

وتغنى للخايفين

غنوة فرح وحنين

والعزم يبقى حديد

ويعيش سنين و سنين

والخوف أكيد ينهار

يا كاتب الأشعار

________________

طير فى الفضا فرحان

شوف الجمال واحكيه

أصل الأمل حيران

قرب وخد بإيديه

واصنع سفينة نوح

واعبر ليالى جروح

وبقوة الإيمان

سافر لأعلى طموح

واهزم سنين أخطار

يا كاتب الأشعار

_______________

كلم نجوع وكفور

كلم نخيل ورمال

كلم جزر وبحور

كلم غصون وجبال

الحق بكرة أكيد

ينشد أغانى العيد

والشمس تبعت نور

والليل يروح لبعيد

والناس تعيش أحرار

يا كاتب الأشعار

______________

زر الذهاب إلى الأعلى