عاجل

بالفايظ

شعرفاطمة علام

نقلها ناصف ناصف

سلفني الضحكة اللي ف روحك

أنا قلبي من الضحك مفلس

متعشم ف براءة بوحك

يابو ضحكة الواجب تتدرس

وقريب هيرد جميلك

لما يكون فرحان وكويس

أنا باعشق ف الضحك شفايفك

لو نطقت والحب اتكلم

ويافرحة قلبي لو شايفك

بتوزع ضحكك وتسلم

بتنسيه على طول أحزانه

وتداوي فيه اللي اتألم

              …

سلفني ضحكة ع النوتة

تبقالي غنوة وزغروتة

وف افراح حتتنا آخدهم

يبقوا نقوط فرح البنوتة

وف ساعة مواعيدها تاخدها

مختومة بشفايف التوتة

سلفني ضحكة وبالفايظ

يبقالك مطرحهم دستة

وفوقيهم من قلبي جوايز

يكتب لك بمعادهم لستة

يوم قلبي مايحسك عايز

فوق منهم يبعتلك ستة

وابعتلي ضحكة ف منديلك

تحت حساب الحب الجاري

ده انا قلبي سهران يناديلك

مش قادر يصبر ويداري

الشوق العاشق تفاصيلك

يابو ضحكة بتبرد ناري ..

سلفني الضحكة اللي ف روحك

أنا قلبي م الضحك مفلس

متعشم ف براءة بوحك

يابو ضحكة الواجب تتدرس

وقريب هيرد جميلك

لما يكون فرحان وكويس

#فاطمة علام#

زر الذهاب إلى الأعلى