أعدته وكتبته د/ياسمين ناجي
مدرس مساعد بقسم الصحة النفسية- كلية التربية- جامعة السويس
حبيت أكتب مقال اليوم بالعامية..
رسالة لكل أم ملكة بيتها.. أعلم أن مسئولية البيت تقع بكامل ما فيها على كل من الزوج والزوجة.. ولكنني أوجه مقالي هذا للأم لأن بدورها من خلال النقاش مع الأب في مساعدتها على القيام بما نتحدث عنه اليوم..
ابنك وبنتك ثمارك في الدنيا لازم تراعيهم علشان ينضجون صح، بأيديك تخلي الثمرة ناضجة وتصلح إنها تعيش في المجتمع وحين يقوم المجتمع بقطفها منك علشان يفيده هيكون عنده صحة نفسية تصلح تعيش فيه وتقاوم وتواجه أي صعوبات، وده بيجي من اهتمامك بابنك/ بنتك والحفاظ عليهم من غير أي مشاكل أو أمراض أو تعب أو أزمات جسدية.
◄ عودي طفلك على النوم من بدري قبل ما تبدأ الدراسة يعني قبلها بأسبوع مثلاً.. وبما أن غدًا اليوم الدراسي الأول فيمكن القيام بذلك في أول أسبوع.
◄ خليه ينام 8 ساعات، خليه ياخد شاور دافئًا ويشرب كوب لبن ويروح أوضة النوم وابعدي عنه كل وسائل التشتت (التليفزيون، الموبايل، الراديو، الكاسيت،….) ويقعد على سريره ويقرأ آية الكرسي ولو كان صغير أقرأيهاله وخلي جو أوضته مهيىء للنوم كويس وممكن تحكي له حدوتة قبل النوم لحد ما ينام، في الأول الموضوع هيبقى صعب لأنه متعود على النوم متأخر في الإجازة بس بعد كده هيلاقي الموضوع سهل وهيتعود عليه، استمري كده لحد ما تبدأ الدراسة.. أو في أول أسبوع في الدراسة.
◄ نوم طفلك ل 8 ساعات مفيد جداا لجسمه وكل وظائف جسمه وعقله ونشاطه وحيويته لما يصحى من النوم هيكون جسمه أخد كفايته من النوم والمعدة هتكون اتضبطت لمواعيد استقبال الأكل وهتشتغل من غير تعب ولا مجهود، ولما تيجي تصحيه أول يوم للمدرسة هيكون نشيط جداا.
◄ لما يصحى من النوم بلاش تحسسيه إن فيه حرب وبلاش تكوني عصبية وخليكي منظمة في كل حاجة علشان إنتي الأساس وبسببك هيكون منظم وهتخليه يفطر كويس وبهدوء، وياريت لو تصحيه من بدري قبلها بساعة لأنه هيكون خد كفايته من النوم وخليه يضبط نفسه من حمام للبس هدوم لتحضير شنطته في نصف ساعة، في الوقت ده معدته هتكون جاهزة لإستقبال الأكل وهيجوع كمان.
◄ عوديه يأكل المفيد لجسمه زي مثلاً كوب لبن، بيضة مسلوقة، شوفان بالزبادي، شوفان بثمرة فاكهة، نصف ساندوتش جبنة مع خيار وزيتون، على فكرة البروتينات مفيدة جدا لجسمه ويساعده في بناء جسمه وعظامه وأحسن وقت يستفيد الجسم من البروتينات هيا من الصبح لحد الساعة 12 ظهرًا، بعد الوقت ده اعملي حسابك إنها تضره لأنها تتحول لدهون في جسمه.
◄ وخليه يحضر ساندوتشاته بنفسه عوديه على كده حطي قدامه العيش والجبن والبيض والخضراوات المتقطعة وخليه يعملها بإيديه وبكده تضمني إنه هياكلها لأنه عمل الساندوتشات بإللي بيحبه.
◄ أبعديه عن العصائر المحفوظة تمامًا والكيكات المغلفة وجميع المقرمشات والبطاطس كل ده بيأذيه وبيضره، لأن لو معدته نزلها كل الأكل ده تروح على الكبد الأول علشان تنقيه من كل المواد الحافظة ويتبقى لجسمه اللي هيفيده وبكده بيرهق الكبد وتخليه مليان سموم.
◄ أبعديه عن ساندوتشات الأطعمة الباردة زي البرجر والنصف مقلية زي البانيه وكوكي وغيره من الأكل الجاهز، كل ده هيضر جسمه لأنه يتركز في صورة دهون وكمان فيها مواد حافظة ومواد مسرطنة يعني أنتي كده بتضري جسمه وترهقي كل أجهزة جسمه وهو صغير.
◄ أبعديه عن المشروبات الغازية بجميع أنواعها لو كانت سودا هيكون فيها كافيين ولو كانت بيضا الغازات اللي فيها تتحول لسكريات وهتتركز في الجسم وخصوصًا منطقة البطن علشان كده نلاقي الطفل لسه صغير وعنده كرش.
◄ اعملي حسابك أنه يكون معاه اللانش بوكس علشان لو جاع وهو في المدرسة وحطيوله فيه الفاكهة والخضروات مقطعة اللي يحبها ودي بتكون سناكس، وكمان ياريت تخليه دائما يأكلها بدل ما يشربها عصائر لأن الألياف الموجودة فيها مفيدة جدًا لجسمه.
◄ بعد بقى ما يرجع من المدرسة تكوني حضرتي وجبة الغداء برضه لازم تكون وجبة مفيدة لجسمه وابعدي تماما عن الوجبات السريعة والجاهزة، جهزيله وجبة متكاملة من البروتينات والنشويات والدهون بنسب تناسب جسمه واحتياجاته.
*** بكده تضمني أن ابنك وصل لجسمه كل ما هو مفيد وكمان تضمني إن عقله يفضل شغال في المدرسة، لأن المواد الحافظة والأغذية السريعة والباردة كلها بتوقف نشاط المخ وتخلي الطفل يفقد تركيزه.
◄ عوديه دائمًا على ممارسة الرياضة حتى لو كانت بسيطة زي مثلا (يتحرك في البيت يرتب سريره وهدومه ومكتبه يساعدك في إعداد طاولة الطعام) حتى لو تعلميه كذا حركة للرياضة ويا سلام كمان لو تعملي معاه علشان تحمسيه وتحببيه فيها وكمان بقى لو تشغليله الموسيقى اللي بيحبها تناسب الرياضة هتلاقي جو البيت كله نشاط وحيوية وهيبدأ يومه وهو سعيد.
*** لازم تعرفي إنك أساس كل طاقة ونشاط وحركة ونظام في البيت عيشي مع طفلك كل لحظة بس في نفس الوقت خليه يعتمد على نفسه.
